МИНИСТЕРСТВОТО ЗА ЗДРАВСТВО

објавува

ЈАВЕН ПОВИК

за искажување интерес за стручно усовршување-кратка едукација (3-4 месеци) во Универзитетскиот медицински Центар Hadassah-hebrew во Ерусалим, во следните медицински области:

– Анестезија, реанимација и интензивно лекување

– Ургентна медицина

– Васкуларна хирургија

– Торакална хирургија

– Педијатриска кардиологија

– Неонатологија

– Неврологија

– Неврохирургија

– Урологија

– Дигестивна хирургија

– Третман за плодност

Заинтересираните кандидати може да бидат доктори на медицина–специјализанти или доктори-специјалисти, вработени во ЈЗУ или Институти.

Заинтересираните кандидати потребно е да ги достават следните документи:

• Лиценца за работа
• Диплома од Медицински факултет
• Доказ за година на специјализација
• Уверение за специјализација
• CV и три писма со препораки
• Потврда од моменталниот работодавец, односно доказ за работа во ЈЗУ или Институт.

Апликациите може да се достават најдоцна до 15 февруари во архивата на Министерството за здравство или по пошта на следната адреса: Министерство за здравство, ул. „50 -та Дивизија“ бр.14, Скопје, со назнака „Јавен повик за искажување интерес за стручно доусовршување во универзитетски медицински центар во Израел“.

МИНИСТЕРСТВО ЗА ЗДРАВСТВО

Почитувани,

на следниов линк можете да го преземете моделот на статут на јавна здравствена установа – Здравствен дом

Клиниките за гастроентерохепатологија,  уво, нос и грло, торакална и васкуларна хирургија, за хируршки болести „Св.Наум Охридски”, за психијатрија, како и Клиничката болница во Штип и општите болници во Гевгелија, Струга, Велес и Кочани, се јавни здравствени установи со најдобри постигнувања во 2013 година.

Oва го покажуваат од резултатите од имплементацијата на системот за Избалансиран приказ на постигнувањата на јавните здравствени установи (Balanced Score Card), кој почна да се применува во 2013 година, како една од најсовремените стратешки алатки за следење на работата на јавните здравствени установи во Република Македонија. Станува збор за алатка со која се евалуираат постигнувањата на менаџментот на секоја здравствена установа, преку следење на четири области: финансии, пациенти, клинички фокус, развој и обука.

На презентацијата на резултатите денеска на прес-конференција министерот за здравство рече дека Клиниката за гастроентерохепатологија ги постигнала сите предвидени таргети по индикаторите, односно работи без долгови, не го надминува буџетот за лекови и медицински потрошен материјал, поттикнува воведување на нови интервенции и научна работа, и согласно спроведените анкети пациентите се задоволни од здравствените услуги, а Клиничката болница во Штип има најголеми достигнувања од областа на финансиите

Посочи дека меѓу болниците со најдобри постигнувања за 2013 недостига Градската општа болница „8 Септември“, бидејќи, појасни, таа јавна здравствена установа оваа година има зголемен обем на услуги, а тоа значително влијае на финансиската состојба, за што ќе биде направена евалуација во наредниот период.

- Кај здравствените домови во топ 5 се издвоија ЗД во Валандово (со исполнети сите таргети од областа на клинички фокус, пациенти и развој и обука), во Скопје, Берово, Делчево и Пехчево. Меѓу специјалните болници, најдобри постигнувања има Специјалната болница за белодробни заболувања и туберкулоза – Јасеново, потоа Заводот за физикална медицина и рехабилитација со целосно исполнети таргети по индикаторите во областите на пациенти и клинички фокус, како и Институтот за белодробни заболувања и ТБЦ, кој и покрај зголемениот број на пациенти, бележи намалување на долговите, рече Тодоров.

Станува збор базични резултати кои треба да претставуваат поттик за натамошно подобрување на постигнувањата на јавните здравствени установи, односно целокупно унапредување на здравствениот систем во државата.

За 2015 година, истакна, развивме нова методологија со утврдени национални индикатори, како и индивидуални индикатори на успешност за секоја јавна здравствена установа, а предвидуваме поголем број индикатори во сите области.

- Од новите индикатори што се воведуваат би ги издвоил: следење на реадмисии или ревизии во рок од 30 дена по хоспитализација или хируршка интервенција, смртноста од мозочен удар или миокарден инфаркт, процент на породувања извршени со царски рез, време на чекање за хистопатолошки наод, искористеност на операциони сали, должина на болничкиот престој, неоправдано препраќање во други здравствени установи, како и индикатори во врска со итната медицинска помош.

Значајна новина е што доколку долговите на јавната здравствена установа не се намалуваат, а тоа се должи на зголемениот обем на работа, тогаш тоа нема да се одрази на постигнувањата на таа установа.

Со последните измени на Законот за здравствена заштита, системот за Избалансиран приказ на постигнувањата на ЈЗУ, е ставен во законска рамка, односно станува законска обврска според која ќе се евалуира менаџментот на јавните здравствени установи. Согласно измените, директорите на ЈЗУ се должни да организираат и обезбедат тековно прибирање и обработување на податоци потребни за мерење на клучните индикатори на успешност, како и внес на податоците во интегрираниот здравствен информатички систем најдоцна до петти секој месец за претходниот месец.

Министерот за здравство Никола Тодоров престојува во еднодневна посета на Брисел по повод презентирање на извештајот на Европскиот здравствен потрошувачки индекс. На покана на организаторот на настанот Health Consumer Powerhouse, министерот Тодоров одржа говор на тема “Што е тајната зад рапидниот напредок на македонските здравствени перформанси”, во рамки на презентацијата на европскиот здравствен потрошувачки индекс за 2014 година, на кој, како што објави еврокомесарот за здравство, Витенис Андриукатис, Македонија има најголем напредок во Европа и од 27. место во 2013 година, на минатогодишното рангирање заврши на високото 16-то место.

Во своето обраќање пред европската здравствена елита посочи дека реформите во македонскиот здравствен систем не застануваат, а напредокот на европскио индекс го покажуваат тоа.

- Голема чест и привилегија е да бидам тука во својство на министер за здравство во Република Македонија и ја поздравувам можноста да се обратам “во срцето на Европа”. Минатата 2014 година беше одлична година! Година, кога цела Европа и целото човештво почувствува најголема гордост, добивање на една од најпознатите историски вести, а тоа е Розета Мисијата на Европската вселенска агенција и на Филае, што успешно слета на кометата 67П/Чирјумов-Герасименко. И покрај фактот дека Република Македонија во моментов не учествува во програмите на Европската вселенска агенција; ние чувствуваме екстремна радост за таквиот успех и јас навистина верувам дека ќе го видам денот кога мојата земја ќе учествува во програмите на Европската вселенска агенција, истакна на почетокот во своето обраќање министерот Тодоров.

Во однос на тоа што е тајната на брзиот напредок во македонскиот здравствен систем, според Тодоров не е некоја спектакуларна тајна, затоа што земјата едноставно се придржува до основното правило на управување. Секоја компанија, медицинска институција или државен здравствен систем, не може да се води без мерење на перформансите, па според министерот, здравствените активности и процеси треба да се мерат и затоа интегриран здравствен информатички систем е итно потребен. Тој го посочи Националниот систем за електронска медицинска евиденција, кој вклучува здравствени установи од примарно, секундарно и терцијарно здравствено ниво.

- Почнувајќи од 1 јули 2013 година, упатот на специјалист за медицинска нега на пацинетите и дијагностички испитувања се врши само по електронски пат. Во исто време, пациентите може да изберат време на нивниот преглед, како и лекар и медицинска установа. Имплементацијата на електронскиот систем ни овозможи да идентификуваме области за подобрување, како што се времето и причините за продолжени одложувања, како што е недостиг на специјалисти или недостаток на опрема, како и во некои случаи на субјективниот фактор или лошата организација на работните активности. Управувањето со идентификуваните недостатоци придонесе да се зголеми пристапот до здравствени услуги во Република Македонија, како и до значително намалување на времето на чекање во одредени медицински специјалности, посочи македонскиот министер за здравство на презентацијата во Брисел.

Електронскиот систем овозможи да се создадат регистри за многу болести, како и следење на капацитетот и користењето на здравствените ресурси. Електронска медицинска евиденција, исто така е креирана и тој посочи дека е многу полесно да се справите со системот на здравствена заштита, преку анализа на големи количества на податоци и информации собрани преку Националниот електронски систем, наместо да се управува “во мрак”.

Воведено е и задолжително користење на електронски рецепт, електронски централен регистар за лекови што содржи потребни информации за пациентите и здравствените работници. Тој рече дека е направена значителна рационализација на трошоците, преку имплементација на новата методологија за утврдување на цените на лекови, а и намалени се цените на околу 4.000 лекови и неверојатна финансиска заштеда од околу 36 милиони евра. Дополнителни заштеди, според Тодоров се направени во однос на паралелниот увоз и системот за централизирано купување на скапи лекови, терапија со инсулин, леќи, лабораториски реактанти итн. Од друга страна, антибиотици без рецепт не може да се добијат во Македонија.

- Заедно со основањето Национален систем за електронска медицинска евиденција, спроведовме промени кои придонесоа да се зголеми ефикасноста на нашиот здравствен систем. На пример, во последните две години перформансите на медицинските институции се мерат преку систем на Картичка за рамномерен резултат кој се состои од следниве четири области: финансии, пациентите како корисници на системот, клинички фокус, како и развој и образование. Оценката на достигнувањата на здравствените установи, во согласност со развиените индикатори е во фактот на оценување на институциите за управување со медицински, споредување на постигнатите резултати со планираните резултати, што значи дека дополнителните средства за секоја здравствена установа зависат од реализацијата на поставените задачи, што финансиски може да варира меѓу минус 20 проценти до плус 20 отсто од основната плата, образложи Тодоров пред присутните во конференциската сала на хотелот “Тон” во Брисел.

Покрај тоа, според првиот човек на македонското здравство, управувањето со оценувањето според постигнувањата почна пред две ипол години, при што специјалисти од секундарно и терцијарно здравствено ниво се плаќаат врз основа на постигнатиот труд, во рамки од минус 20 отсто до плус 20 проценти од основната плата, а специјалисти со најголем труд на национално ниво се објавуваат јавно и им се доделува дополнителна плата. Всушност, Картичката за рамномерен резултат и трудот, тој посочи дека се интегрирани функции и дел од Националниот систем за електронска медицинска евиденција. Тој напомена дека во последните неколку години се инвестирани во најнапредна медицинска опрема над 100 милиони евра, од што повеќето е напредна компјутерска томографија, магнетна резонанца, дигитални рентген машини, лаборатории, ултразвук машини, опрема за ендоскопија, ангиографија за интервентна кардиолошка мрежа, како и мрежа за линеарни акцелератори за онкологија.

Тодоров рече дека во Македонија се вршат реконструкции или изградба на голем број медицински установи низ целата земја, во вредност од над 100 милиони евра, а се отвора и нов педијатриски ургентен центар во Скопје. Покрај тоа, во процес е и изградба на нов Клинички центар “Мајка Тереза”, како најголем инфраструктурен проект во македонскиот здравствен систем досега.

Во текот на последните две ипол години, со цел да се имплементираат нови медицински методи, македонскито министер поосчи дека е подобрена грижата за пациентите, комуникациските вештини и воспоставување на контакти со професионалци од целиот свет, како и медицински сестри, техничари за ултра-зраци се обучуваат и образуваат во многу престижни и истакнати медицински центри низ светот.

Во меѓувреме, според министерот, има многу добро етаблирани медицински експерти од странство кои живеат во Македонија, кои направиле неверојатен придонес кон имплементација на новите методи и процедури. Тодоров го наведе и носењето на Законот за медицински студии и континуиран професионален развој, кои вклучуваат стручен испит што треба да се преземе во рамки на медицинскиот симулациски центар. Овој закон, според него, вклучува задолжително видео-пишување на сите ендоскопски интервенции и одредени процедури на отворена хирургија.

– За прв пат, воспоставен е Национален план за специјализација и супспецијализација. Им дозволуваме на специјалистите од приватните здравствени установи да имаат достапност до јавните здравствени установи, како и македонски експерти од земјите-членки на ОБСЕ да може да се вратат во нашиот здравствен систем. Во изминатиот период, имавме рекорден број на нови вработувања, околу 2.000 нови вработени во здравствениот систем. Купивме нови, повеќето напредни возила за итна помош, имаме усвоени протоколи и обезбедивме обука за персонал за итни случаи и усвоивме над 1.000 клинички упатства и многу клинички патеки. Имаме воспоставено испит за менаџерите на медицинските институции, протокол за култура во болниците, како и континуирано оценување на задоволството на пациентите, набројуваше министерот за здравство на Република Македонија.

Со последните измени на Законот за здравствена заштита, кои неодамна беа донесени, според Никола Тодоров, се воспостави Национален електронски сметководствен систем кој ќе биде интегриран во Националниот систем за електронска медицинска евиденција и истиот ќе води сметка за медицинските материјали за секој пациент.

Тодоров го претстави и воведувањето на национален пат на малигните заболувања кои одредуваат максимално време на чекање за секои медицински услуги за овие пациенти, од моментот на дијагнозата на болеста и во текот на целиот период на третман. Спроед него, се имплементираат сериозни промени во начинот на специјализации, што се врши со цел да се зголеми нивниот квалитет преку воспоставување на посреднички испит и колоквиуми на секој круг, задолжителна образовна литература се користи од првите десет универзитети според Шангајската листа во областа на медицината, се утврдува минимален број на интервенции, испитувања или операции кои секој лекар-приправник треба да ги изврши, како и учење на два странски јазици во текот на специјализацијата, меѓу кои англискиот јазик е задолжителен. Тој рече и дека има задолжителен престој од најмалку три месеци во престижна медицинска институција во Европската унија или во САД, пред стекнување на звањето специјалист.

– Планираме да формираме Национален комитет за дијабетес мелитус, насочен кон контролирање на неконтролирано трошење на скапиот инсулин, а во исто време, во насока на строго почитување на националните упатства со цел да се подобри третманот на пациентите со дијабетес. Со овие измени во законот и овозможување на полесна и ефикасна трансплантација на кадаверик ефикасноста, имаме зголемување на бројот на трансплантација на бубрег, иако во оваа област се уште сме “црвени” во согласност со европскиот Индекс на здравствена заштита на потрошувачите, посочи Тодоров.

Друг важен факт е дека по претходните зголемувања на платите на специјалистите во јавните здравствени установи на секундарно ниво на здравствена заштита, Тодоров рече дека неодамна се зголемија платите на специјалистите на терцијарно здравствена ниво за околу 25 проценти. Европскиот Индекс за здравство на потрошувачите, според македонскиот министер е исклучително важна алатка за Македонија од аспект на постојано подобрување, како и споредба со другите здравствени системи во Европа. Интересно, експертите на Европската комисија во рамки на ЕУ-Твининг проектот за зајакнување на капацитетите на Министерството за финансии на Република Македонија за макроекономски анализи и креирање на политиките. Овие го користеле Индексот за Европска здравствена заштита на потрошувачите како кредибилен индекс на споредба меѓу здравствените системи во Европа.

– Вреди да се спомне дека пред да ги почнеме нашите реформи на системот, бевме водени од визијата да се воспостави здравјето на пациентот во центарот на системот и да ги фокусираме сите наши активности на пациентот. Конечно, и покрај значителните подобрувања во нашиот здравствен систем, ние сме свесни дека се уште сме зад водечките европските здравствени системи од аспект на здравјето во клучниот сет на индикатори, па од таа причина секоја од нашите активности во однос на правата на пациентите и информации, достапноста на здравствените услуги и лекови, па дури и опсегот на здравствени услуги и превенција, се врши со цел да се подобри здравјето на пациентите и продолжување на квалитетот на животот на нашите граѓани. Ние имаме долг пат пред нас, со цел за спроведување на тековните проекти, како и многу нови проекти што доаѓаат, посочи министерот Тодоров.

Министерот за здравство на Република Македонија, Никола Тодоров, попладнево во Европската комисија оствари средба со комесарот за здравство, Витенис Андриукаитис, на која главна тема беа македонските реформи во здравството, што придонесоа за историски напредок на нашата земја на Индексот на европскиот здравствен потрошувачки индекс за 2014 година, каде од 28-то место во 2013 година, годинава е на високото 16-то место во Европа.

- Денеска имав задоволство да се сретнам со еврокомесарот за здравство Андриукаитис, со кого разговаравме за состојбите во здравството во Република Македонија, но и во здравството во Европската унија и во земјите-членки на ЕУ. Разговаравме кои се предизвиците со кои се соочуваме и кои се мерките што ги преземавме и ги преземаме, како и проектите што ги превзема Македонија на ова поле, истакна министерот Тодоров по средбата.

Првиот човек на македонското здравство го информирал еврокомесарот за активностите што ги прави македонската Влада во поглед на инвестициите во инфраструктурата, набавката на новата опрема, едукацијата на македонските лекари во најдобрите болници во Европската унија и во САД, системот за менаџмент и управување со здравствените установи, проектите и политиката во поглед на намалување на цените на лековите, заштедите и постојаното инвестирање во здравството, односно недозволувањето и во време на криза да се намали вкупниот буџет за здравство во Република Македонија.

- Разговаравме и за предизвиците што се во моментов во здравствените системи во Унијата, афектирани од последната економска и финансиска криза што ја зафати и ЕУ и како здравствените национални системи реагираат на тоа, оти е познато дека во Европа, т.е. во ЕУ нема заедничка здравствена политика, туку секоја земја-членка има сопствена здравствена политика. Тоа, и по излагањето нa еврокомесарот е предност на Унијата, бидејќи може сите да ги преземаат најдобрите пракси и да учат од некои грешки или лоши политики што се превземени во една или во друга земја, посочи Тодоров.

Од канцеларијата на еврокомесарот за здравство информираат дека Андриукаитис со заодовлство потенцирал на средбата дека пристапните преговори со Македонија во областа на здравството „напредуваат одлично”.

- Министерот го информираше комесарот за здравствените реформи што се во тек во неговата земја, вклучително инвестициите во опрема, инфраструктура, обука на здравствените професионалци, промоција и превенција, посебно во однос на алкохолот и за други бројни мерки. Потенциран е и здравствениот информациски систем и индикаторите за системот на здравствени перформанси. Комесарот ја изрази својата волја да го поддржи македонскиот министер за здравство во овие реформи, гласи соопштението од Еврокомисијата за оваа средба.

Со оваа средба на највисоко ниво во Европската комисија, министерот Никола Тодоров ја заврши еднодневната работна посета на Брисел

Почитувани граѓани,

Информираме дека влезе во сила Законот за биомедицинско потпомогнато оплодување и неговите измени и дополнувања (со кој ја воведовме можноста за раѓање на дете за друг, односно го воведовме таканареченото сурогат мајчинство). Во оваа прилика, им се обраќаме на сите брачни двојки кои не може да ја реализираат родителската улога по природен пат, а воедно и на хуманите жени кои од алтруистички побуди би родиле деца за овие брачни двојки, за да им го покажеме патот за остварување на овие можности.

Првиот чекор што треба да го направат заинтересираните е да се обратат во Министерството за здравство, со доставување на документација со која потврдуваат дека ги исполнуваат условите.

До Министерството може да се обратат жени на возраст од најмалку 25 години живот и повозрасни, односно на возраст за која е оценето дека е во добра психофизичка и општа здравствена состојба која и овозможува на жената здрава бременост и раѓање на здраво дете. Покрај тоа, жените треба да бидат мајки на најмалку едно дете и да бидат македонски државјани.

До Министерството може да се обратат и брачни двојки,  државјани на Република Македонија, кои имаат проблем со женски или машки стерилитет, односно жената од брачната двојка нема матка и/или има оштетена матка, нема јајници и/или има оштетени јајници, а мажот од брачната двојка исто така истовремено може да има стерилитет кој не може да биде излекуван. И не само во случај на стерилитет, туку и во случај кога брачната двојка дотогаш имала три неуспешни бремености на жената.

Министерството за здравство води два регистри, од кои еден за жените кои се потенцијални гестациски носители, а другиот за брачните двојки. Министерството ги внесува податоците во овие регистри, откако ќе утврди дека се исполнети условите, со што се заокружува неговата улога во оваа фаза на утврдување на статусот на потенцијален гестациски носител, односно брачна двојка која има право да побара раѓање на дете од друга жена.

Вториот чекор што треба да го направат заинтересираните брачни двојки е да се обратат во Министерството за здравство со барање за увид во соодветниот регистар заради вршење избор на гестациски носител. Изборот на гестацискиот носител не го врши Министерството за здравство, туку самата брачна двојка, која има право на пристап до податоците во регистарот на жени-гестациски носители заради вршење избор и за таа цел повторно се обраќа до Министерството за здравство со барање за увид во соодветниот регистар. Само за илустрација, во постапката за посвојување дете, Комисијата за посвојување врши избор на најсоодветен посвоител по електронски пат од првите три можни посвоители од листата на можни посвоители. Улогата на Министерството за здравство е да ја гарантира законитоста на постапката, но не и да се вклучува во поврзувањето на брачната двојка и гестацискиот носител.

Третиот чекор што треба да го направат заинтересираните брачни двојки е да се обратат во Министерството за здравство за да ја започнат постапката за БПО со гестациски носител. Тоа го прават со доставување на писмено барање до Министерството за здравство.

За постапката на БПО со гестациски носител да почне, потребно е сите учесници во оваа постапка да се согласат (со давање на писмена изјава заверена кај нотар) и претходно да бидат стручно советувани за психолошките и правните последици од оваа постапка, од страна на Комисијата за психолошко советување и Комисијата за правно советување.

Министерството за здравство по добивање на писменото барање, утврдува дали се исполнети сите услови од овој закон за поведување на постапката и писмено ќе ја извести брачната двојка и потенцијалниот гестациски носител. Доколку се исполнети условите за поведување на постапка на БПО со гестациски носител, брачната двојка и потенцијалниот гестациски носител склучуваат договор за уредување на меѓусебните права и обврски кои произлегуваат од таа постапка. Брачната двојка и потенцијалниот гестациски носител можат да ја повлечат согласноста се додека ембрионот не е внесен во матката на жената гестациски носител, а најдоцна два дена пред денот на внесувањето на ембрионот во матката на жената гестациски носител. Брачната двојка има право да бара поведување на две постапки на БПО со гестациски носител кои успешно ќе завршат со раѓање на по едно живо дете од секоја постапка, додека гестацискиот носител има право само еднаш да роди едно живо дете за друг. Гестацискиот носител и жената од брачната двојка која е во работен однос ги има сите права од областа на работните односи, пензиското и инвалидското осигурување и здравственото осигурување по основ на бременост и раѓање. Гестацискиот носител која е во работен однос има право на отсуство од работа поради бременост и раѓање во времетраење од 45 дена од денот на раѓањето на детето. Жената од брачната двојка остварува право на породилно отсуство како да го родила детето, односно децата, за што до Фондот за здравствено осигурување на Македонија доставува и потврда издадена од Министерство за здравство.

Сите прашања поврзани со оваа тема, пратете ги на е-маил: tatjana.vasic@zdravstvo.gov.mk и оставете свои контакт податоци: име и презиме и телефонски број. 

Кризниот штаб денеска одржа состанок во општината Чешиново-Облешево по настанатите поплави во подрачјето, на кој присуствуваше и министерот за здравство, Никола Тодоров, заедно со професори, доктори-епидемиолози и специјалисти по хигиена од Институтот за јавно здравје и Секторот за превентивна здравствена заштита при Министерството, како и шефот на Канцеларијата на Светската здравствена организација во Скопје.

На состанокот е констатирано дека досега нема пријави за заразни заболувања на ова подрачје, а Центарот за јавно здравје будно ја следи состојбата во однос на безбедноста на водата за пиење и евентуална појава на заразни заболувања. Дадени се насоки на Центарот за јавно здравје од ова подрачје секојдневно да врши контрола на водата за пиење и да го информира населението за превентивните мерки со цел спречување појава на заразни болести, како што се: пиење флаширана вода или вода од обезбедени цистерни, превривање на водата за други потреби во домаќинството – миење, готвење, редовно одржување лична хигиена и миење раце.

Исто така, Центарот за јавно здравје е задолжен да спроведе комплетно чистење на ризичните поплавени подрачја и да изврши превентивна дезинфекција и дератизација.

Јавните здравствени установи од подрачјето (Здравствен дом Кочани, Општа болница Кочани и Центар за јавно здравје Кочани) се задолжени да обезбедат медицински екипи да ги посетат жителите на населените места кои се отсечени заради настанатите поплави, со цел пружање соодветна здравствена помош доколку е потребна.

Исто така, во амбулантата во општина Чешиново – Облешево, почнувајќи од утре ќе има дополнително присуство на доктор и медицинска сестра во периодот од 10 – 14 часот.

Министерството за здравство е во постојана координација со Кризниот штаб во ова подрачје, Центарот за управување со кризи, Црвениот крст на Република Македонија и сите надлежни институции, со цел заштита на здравјето на населението од поплавените подрачја.

Препораки за користење на водата за пиење во поплавените подрачја

Министерството за здравство упатува препораки за користење на водата за пиење во подрачјата кои се поплавени, со цел превенција и заштита од ширење заразни болести.

- Доколку користат вода од приватен бунар или други приватни водоснабдителни системи кои не се под контрола на јавно претпријатие, жителите на поплавените населени места во овие подрачја треба да ја превриваат водата пред да ја користат за пиење.
Овие препораки треба да се почитуваат и во други населени места кои се поплавени. 

Според добиените информации од Центарот за управување со кризи, поплавени се населени места Просениково и Дабиле (општина Струмица), Босилово, Карбинци (општина Штип), Чешиново, Облешево, Чифлик и Уларци (општина Чешиново-Облешево), Мачево, Будинарци, Ратевска река (општина Берово), Ношпал, Вешерејца, Тополчани (општина Могила), повеќе населени места по течението на Црна Река во Прилепско, Покрвеник, Прељубле, Дрмени, Езерани, Долна Бела Црква (општина Ресен), Ерџелија (општина Свети Николе), Мислешево, Мороишта, населба Езерски Лозја (општина Струга).

Министерството за здравство повторно укажува на населението од овие подрачја да ги следи препораките од центрите за јавно здравје

Нема појава на заразни заболувања во поплавените региони во државата. Во моментов, водата за пиење не е безбедна во Штип, Пробиштип, Неготино, Чешиново-Облешево, како и во селските подрачја каде поради заматување и физичко-хемиска неисправност, по препорака на центрите за јавно здравје е забранета од Агенцијата за храна и ветеринарство.

Во местата каде е забранета водата за пиење граѓаните се снабдуваат со спакувана вода или од цистерни за вода за пиење. Исто така, се дистрибуирани флаери со препораки за населението во поплавените подрачја преку центрите за јавно здравје, изработени од Институтот за јавно здравје, во соработка со Министерството за здравство.

Во флаерите се дадени препораки како да се зачува здравјето, како да се подготвува храна, како да се одржува личната и колективната хигиена, и како да се употребува водата за пиење

Треба да се пие само безбедна вода за пиење, онаму каде не е прогласено дека таа вода е забранета заради заматеност или физичко-хемиска или бактериолошка неисправност и да се почитуваат препораките за одржување лична хигиена и консумирање безбедна храна. Во овие подрачја каде има пластеници каде се произведува овошје и зеленчук и се препорачува добро да се измие со безбедна вода и потоа да се консумира, а кога ќе помине првиот бран ќе се направи дезинфекција на детските градинки, основните и средните училишта како и на здравствените установи.

Експерти од Институтот за јавно здравје и претставници од Министерството биле на терен и ги посетија поплавените области, Чешиново Облешево и битолскиот регион.

Во прилог е флаерот за последиците од поплави и како да се заштити здравјето на населението.Flaer-za-poloplavi

Нови апарати за брза, навремена и 100 отсто точна детекција на туберкулозата, набавени преку Глобалниот фонд функционираат на Институтот за белодробни заболувања и туберкулоза – Скопје. Со апаратите во рок од 24 часа до 48 часа може точно да се детектира на ниво на ДНК туберкулоза и може да се утврди дали има резистентност на определена терапија.

Вредноста на апаратите заедно со набавениот потрошен материјал е над 70.000 евра.

Министерот за здравство Никола Тодоров го посети Институтот за белодробни заболувања и туберкулоза и изјави дека едниот апарат овозможува да се прави брза дијагностика која е на ниво на ДНК и сериозно го забрзува времето на добивање на 100 отсто точна дијагноза на 24 часа до 48 часа во споредба со претходната апаратура, поради тоа се правеле дополнителни испитувања кои понекогаш траеле од месец до месец и половина.

Денеска, посочи министерот, тие испитувања се прават за 24 часа што значи дека времето за чекање на точната дијагноза се скрати од еден и пол месец на еден ден. Потенцира дека втората работа која исто така е многу значајна е резистентноста на определен тип терапија на лицата болни од туберкулоза, за што по овој месец и половина чекање се правела и дополнителна анализа која траела исто така уште еден и пол месец.

– Тоа е период од три месеци кој требало да помине за да се утврди 100 отсто точна дијагноза и да се утврди дали има определена резистентност. Сега целиот тој период е сведен за 24 до 48 часа што значи сериозно намалување на времето за добивање на резултатот и подигнување на нивото на квалитетно лекување на болните.

Директорката на Институтот за белодробни заболувања и туберкулоза – Скопје, Билјана Илиевска Попоска посочи дека значително е напредната дијагностиката на заболувањето и очекуваат со новите тестови да придонесат за натамошно намалување и што поуспешно лекување на болните од туберкулоза во Македонија.

Појасни дека другиот нов тест познат како квантиферон кој се применува, детектира инфекција само од хуманиот тип туберкулозни бактерии, што значи, укажа, ќе ги открие вистинските носители на туберкулозната инфекција и ќе придонесе на натамошна што поуспешна контрола на туберкулозна инфекција и на туберкулозата како болест. Додаде дека имаат обучен кадар кој ги применува тестовите.

Децата кои имаат потешкотии при изговарање на зборовите, отсега нивните матични лекари преку „Мој термин“ ќе може да ги упатат на логопед до најблиската поликлиника.

Здравствениот дом – Скопје и Заводот за слух, говор и глас – Скопје започнаа со проектот „дисперзиран логопед“ кој ќе се имплементира во поликлиниките „Букурешт“, „Ченто“, „Чаир“, „Горче Петров“ и „Јане Сандански“.

„Секој вторник и четврток од 8 до 16 часот на пет поликлиники ќе има логопеди од Заводот за слух, говор и глас кои ќе им ја пружат потребната терапија на децата. Целта на дисперзираните логопеди е да бидат што поблиску до домот на децата за да може побрзо и поефикасно да им се даде потребната услуга“, изјави Татијана Баевска – Бучковиќ, директорката на Здравствен дом – Скопје.

Директорката на Заводот за слух, говор и глас, Живка Јордановска посочи дека со отворањето на дисперзирани логопеди ќе им заштедат време и пари на нивните родители, бидејќи ќе нема да мора да плаќаат превоз и ќе имаат повеќе време да им посветат на своите деца.

Министерот за здравство Никола Тодоров денеска престојува во еднодневна работна посета на Софија, каде што ќе се сретне со бугарскиот министер за здравство Петар Стефанов Москов.

На средбата ќе бидат разгледани можностите за унапредување на соработката во здравствениот сектор, особено од аспект на едукација и доусовршување на медицинскиот персонал, а воедно ќе стане збор за континуираните реформи во областа на здравството во двете држави.

Во рамки на посетата, министерот Тодоров ќе се сретне и со проф. д-р Марин Маринов, декан на Медицински факултет при Медицинскиот Универзитет во Софија.

На средбата ќе стане за можноста за едукација на медицински кадар од повеќе области и специјалности, како дел од Програмата на Министерството за здравство за едукација на здравствени работници во реномирани медицински центри во странство

Во јавните здравствени установи во државата, согласно Законот за трансформација во редовен работен однос на неопределено време ќе се вработат околу 2.000 лица, меѓу кои се доктори, медицински сестри, техничари, хигиеничари, правници, информатичари… кои досега или волонтирале или работеле со договори на определено време.

За вработувањето на овие лица постапката веќе е во тек. Во првата група ќе бидат вработени 35 проценти од овие лица, односно околу 700 ќе бидат вработени веднаш, додека останатите ќе бидат вработени на неопределено време од 1 декември оваа година, односно од 1 септември 2016 година.

– Само во општите и клиничките болници низ државата ќе бидат редовно  вработени вкупно 739 лица, од кои во првата група 259 лица. Во Универзитетските клиники во Скопје ќе бидат редовно вработени околу 600 лица, а само во првата група ќе бидат вработени 210 лица. Во здравствените домови ќе бидат вработени вкупно 168 лица, во специјалните болници, заводи и институти низ државата редовно ќе се вработат околу 300 лица. Во Институтот за јавно здравје и центрите за јавно здравје редовно ќе се вработат речиси 200 лица, информираше на прес-конференција министерот за здравство Никола Тодоров.

На ваков начин долгорочно ќе се реши егзистенцијалното прашање на поголем број лица кои досега биле ангажирани во здравствените установи како волонтери или со договори на определено време.

– Ова е исклучително значајна мерка на Владата на Република Македонија, со која ќе помогнеме на илјадници семејства низ државата, имајќи предвид дека досега овие лица не биле редовно вработени и не можеле да остварат право на здравствено, пензиско, односно социјално осигурување, истакна министерот за здравство.

Според Законот, приоритет во динамиката на вработување имаат лицата кои се најдолго ангажирани во установите, односно оние лица кои имаат најдолго работно искуство во установата ќе бидат вработени во првата група.

– Во Специјалната болница за гинекологија и акушерство–Чаир има 15 лица што се ангажирани од 2003 година, кои околу 12 години работат како волонтери или со договор на дело, а сега ќе бидат редовно вработени. По 11 до 12 години се ангажирани и волонтерите во Општата болница Струга, околу 10 години во Институтот за белодробни заболувања и туберкулоза во Скопје и на Клиниката за радиологија. Околу девет години се ангажирани волонтерите или лицата со договор на дело во Клиниката за радиотерапија и онкологија и Клиниката за пулмологија и алергологија, а околу 7 години на Клиниката за хематологија, рече министерот Тодоров.

Mеѓу останатите лица кои подолго време биле ангажирани со договор, како куриозитет е податокот, дека со договор на дело било ангажирано уште од 1994 година.

Сите јавни здравствени установи веќе ги отпочнале постапките за вработување на овие лица и доставување потребни документи до Министерството за здравство, по што тие се доставуваат и до Министерството за финансии, каде се склучуваат договорите. Целата постапка се очекува да биде завршена во законски предвидениот рок од еден месец.

Жителите на 15 поплавени градови низ Македонија (Прилеп, Битола, Ресен, Охрид, Кичево, Демир Хисaр, Велес, Неготино, Кавадарци, Куманово, Свети Николе, Штип, Радовиш, Струмица и Кочани) денес и во наредните денови преку дистрибутивната мрежа на Црвениот Крст ќе добијат 1.200 хигиенски пакети за лична употреба со содржина за период од 2 месеца.

Помошта е обезбедена по консултација на Министерството за здравство во однос на основните потреби на ранливите категории граѓани, преку посебен фонд во рамките на буџетот на УНФПА, одобрен од Одделот за хуманитарен одговор..

Помошта е наменета за целната популација од 743 семејства и граѓани кои беа погодени од поплавите, односно граѓани чии домови биле поплавени или местото на живеење било изолирано според информациите на Центарот за управување со кризи.

Министерството за здравство во соработка со УНФПА и Црвениот крст ќе продолжи да ја следи ситуацијата во поплавените региони и доколку има потреба дополнително адекватно ќе се одоговори.

Во Детската кардиохирургија за неполни две години се извршени 120 кардиохируршки интервенции кај деца. Во рамки на десеттата мисија (од 22 февруари до 7 март) на тимот странски доктори кои работат на проектот Детска кардиохирургија се направени 13 интервенции, а попладнево се извршува 14-тата.

Министерот за здравство Никола Тодоров, кој денеска ја посети Клиниката за детска хирургија изјави дека во рамки на десеттата сесија на тимот странски доктори, е оперирано и бебе старо само пет недели со околу 2,5 кг. тежина.

– Станува збор за исклучително сложени интервенции кои се прават на Клиниката за Детска хирургија во одделот за Детска кардиохирургија. Досега се оперираат пациенти само од Македонија. Се прават листи на 20 до 30 пациенти на кои им е потребна ваква интервенција и потоа тимот врз основа на здравствената состојба на пациентите одлучува за тоа кои ќе бидат ставени на програм за операција. Целиот овој сегмент на Детска кардиохирургија напредува одлично. Околу 50 отсто од интервенциите се направени од македонски доктори со учество на македонски кардиохирург што, како што нагласи, покажува дека целиот овој процес на градење на детската кардиохирургија одлично напредува и одлично се етаблира.

Детската кардиохирургија, потенцира, ја градиме заедно со доктори од САД кои доаѓаат тука и им помагаат на македонските лекари да се изгради целиот овој концепт и тие се вклучени во интервенциите.

- Дел од интервенциите ги работат кардиохирурзите од САД во соработка со македонските лекари од одделот за детска кардиохирургија. Очекувам дека одделот за детска кардиохирургија во наредниот период уште повеќе ќе напредува имајќи предвид дека условите во кои функционираат се одлични, а особено соработката која се воспостави и треба постојано да се унапредува меѓу повеќе здравствени установи вклучени во овој проект, додаде Тодоров.

Марчело Кардарели, детски кардиохирург од САД, истакна дека ја спроведуваат програмата во десет различни земји.

Герет Морган, интервентен кардиолог од САД, посочи дека неговата задача е развој на програмата за интервентна и педијатриска кардиологија.

- Денес извршивме една уникатна процедура на бебе, а имаме уште една закажана попладнево. Се надевам дека ќе бидеме во можност да се вратиме и да изведеме повеќе процедури и дека ќе го обучиме кадарот во Македонија да ги извршува истите. Целта е да се избегнат операции на срце кај деца преку минимално инвазивни процедури, додаде Морган.

Доктор Владимир Чадиковски од Детска хирургија, кој е дел од тимот неонатални кардиохирурзи, рече ќе се направат и четири интервентни кардиолошки интервенции и оти проектот продолжува понатаму.

- Задоволен сум и благодарен за целиот тим и од американската и од македонската страна. Се вложува огромен напор од сите страни, се работи од изутрина од 8 часот до полноќ. Овие две недели се навистина динамични и задоволството е големо. Се повеќе се покомплексни аномалии успеваме да ги згрижиме во Македонија. За овие две години динамиката е добра. Деведесет и пет отсто од случаите ги третираме во Македонија, а пет отсто надвор од Македонија, истакна Чадиковски.

Министерството за здравство почна со реализација на нов, шести по ред, циклус на проектот „Домашна визита“ и со него е опфатена нова категорија лица од руралните и потешко достапни населени места во државата. Проектот се реализира во рамки на Програмата „Здравје за сите“. Посетите се организираат според информациите од системот МојТермин, а пред да дојдат во домот, патронажните тимови се најавуваат телефонски кај граѓаните.

Министерот за здравство Никола Тодоров информираше дека посетите се спроведуваат во периодот од 10 до 14 часот и согласно акцискиот план, денеска патронажните тимови одат во населените места Добрево, Лесново и Древена во регионот на Пробиштип, селата Корошишта и Шум во струшко и во селата Мождивњак и Конопница во регионот кој го покрива Здравствен дом Крива Паланка.

Во повеќе региони низ државата, меѓу кои Скопје, Струга, Охрид, Крива Паланка, Пробиштип, Кичево, Неготино, уште вчера се посетени по неколку села во секој регион.

Во следните два месеца, над 300 патронажни тимови од здравствените домови во државата е предвидено да посетат околу 36.000 лица кои живеат во рурални и потешко достапни средини, со посебен фокус на постарата популација, на кои заради возраста им е потребна поголема здравствена нега, а со оглед на тоа што живеат во рурални средини им е отежнат пристапот до примарна здравствена заштита.

Посетите ги изведуваат обучени сестри од патронажните служби во здравствените домови низ целата држава и тие имаат обврска секојдневно по неколку часа во денот да ги посетуваат постарите, хронично болни лица, кои доколку има потреба се упатуваат на повисоко ниво на медицинска здравствена заштита.

Со проектот Домашна визита досега се опфатени над 50.000 постари лица со хронични болести (респираторни, кардиоваскуларни, дијабетес), а посетите ги изведуваат обучени тимови од патронажна служба од здравствените домови од целата држава, кои вршат мерење крвен притисок, шеќер, холестерол, а воедно даваат совети за исхрана, за физичка активност и други совети за здрави стилови на живеење.

Податоците од терен покажуваат дека кај пациентите кои имаат дијабетес, дел од нив имаат неконтролирано ниво на шеќер, односно нивото на детектираната гликемија е повисоко од посакуваната вредност. Такви случаи се детектирани речиси во сите региони низ Македонија. Кај таквите пациенти даден е совет за исхрана, за промени во животниот стил, интензивирање на физичката активност, како и да се јават кај матичниот доктор за натамошно регулирање на гликемијата. Поради зголеменото ниво на шекер во крвта посетените лица се советувани да направат преглед за да се утврди дали има евентуално оштетување на органи односно да направат ЕКГ, преглед на функцијата на окото и бубрезите.

- На пример, во Куманово од посетените лица околу 2,5 отсто не знаеле дека имаат зголемено ниво на гликемија. Во истиот регион околу 2,7 отсто од посетените лица имале зголемен крвен притисок, а околу 12 отсто (од вкупно посетените лица) имале мускулно-скелетни проблеми. Во Делчево бил детектиран пациент со многу високи вредности на гликемија и истиот бил веднаш упатен во Итната медицинска помош, а потоа препратен во болницата во Штип.

Исто така во охридскиот регион се детектирани пациенти кои имаат потврдена астма, кај помал дел од нив се влошени симптомите (меѓу другото и поради временските прилики) и даден е совет да се јават на пулмолог. Во Кичево од вкупно посетените, околу 20 отсто од нив имаат ново откриена хипертензија, поради што се упатени кај матичните лекари за терапија. Новооткриени пациенти со дијабетес во овој регион биле околу 3-5 отсто, а новооткриени пациенти со зголемени нивоа на маснотии околу 2 отсто.

- Проектот Домашна визита го инициравме како широка акција за превентивни здравствени прегледи со цел зголемување на грижата за постарите и изнемоштени лица и дополнително приближување на здравствената заштита до оваа категорија граѓани. Како резултат на позитивното искуство од терен и искажаниот интерес на граѓаните за овој вид прегледи, одлучивме да ја прошириме акцијата со оваа повозрасна категорија граѓани од руралните подрачја, со ставање силен акцент на превенцијата, која пак е многу значајна за подобрување на севкупната состојба во здравството во државата, додаде Тодоров.

Министерот за здравство Никола Тодоров го посети Интерното одделение во рамки на Општата болница во Кочани и се запозна со примената на методата за ехо кардиографија воведена во јануари.

– Методата за ехо кардиографија во Општа болница Кочани е прифатена од пациентите и досега со неа се направени 280 прегледи. Оваа метода е ставена во Мојтермин за интернистичка дијагностика. Некои од пациентите се испратени на натамошно лекување во Клиничката болница во Штип за интернетна кардиографија, а некои се упатени за кардиохируршка интервенција во Скопје. Оваа нова метода е прифатена од пациентите во Кочани и од источниот регион.

Тој најави трансформација и вработување на 25 волонтери во Општата болница во Кочани. Ме радува фактот што Општа болница со сопствени средства и средства од Министерството за здравство обезбеди потребни медицински апарати и ново возило и дека бројот на пациентите кои побарале помош и лекување во оваа болница се зголемил за 11.000 во однос на предходната година. Недостигот од пет лекари специјалисти наскоро ке биде надминат со нови вработувања, рече Тодоров.

Инаку, во Итната медицинска помош на Здравствениот дом Кочани се вработени еден лекар и три медицински сестри.

Директорот на Општата болница во Кочани, Дејан Апостоловски истакна дека е набавена нова медицинска опрема во вредност од три милиони денари, а деновиве на интерна едукација на кардиохирургија во Скопје ќе биде испратен еден лекар интернист.

Тој посочи дека деновиве ќе биде набавен мамограф бидејки Општа болница Кочани е влезена мегу шесте болници во Македонија кои ќе добијат ваков апарат.

Заменик министерот за здравство, Јовица Андовски го посети Здравствениот дом во Струмица и одржа работна средба со раководството на болницата.

На средбата беше информиран дека во изминати две години во здравствениот дом се реализирани 16 нови вработувања, а во тек е докомплетирање на Службата за Итна медицинска помош со нови пет доктори, две медицински сестри и тројца возачи.

Исто така, од почетокот на годинава е набавено ново медицинско возило за потребите на проектот Рурален доктор, опремено со апарат за ЕКГ и потребната ампуларна терапиjа.
Во подготовка е и проект за комплетна реконструкциjа на санитарните jазли и мрежата за парно греење во сите обjекти на здравствениот дом со енергетски поефикасна инсталациjа, коjа досега не била воопшто обновена од далечната 1957 година.

Амбулантата во Волково е целосно реконструирана и ќе стартува со работа за десетина дена. Објектот е проширен за над 40 метри квадратни и сега има 98 метри квадратни по остапувањето на две простории на општина Ѓорче Петров на Здравствен дом Скопје. Реконструкцијата траела три месеци и е извршена со средства од над 1,7 милиони денари на Здраствен дом Скопје.

Амбулантата денеска ја посети министерот за здравство Никола Тодоров заедно со директорката на Здравствен дом Скопје, Татјана Баевска Вучковиќ, градоначалникот на општина Ѓорче Петров, Сокол Митровски и пратеникот Александар Стојкоски.

Тодоров изјави дека амбулантата е изградена во 1962 година и оттогаш до денес не била направена нејзина реконструкција.

– Идејата е во амбулантата покрај матичните лекари кои работат во неа да има мобилна лабораторија односно да се овозможи минимум еднаш во текот на неделата тука да им се зема крв на пациентите, таа потоа да се транспортира до амбулантата во Ѓорче Петров, таму да се прават крвните анализи и преку меил да се испраќаат на докторите, а тие потоа да ги информираат пациентите за лабораториската анализа.