Скопје, 17 октомври – Сите заинтересирани граѓани од денеска имаат можност да се вакцинираат против сезонски грип во центрите за јавно здравје низ државата, како и во овластени приватни здравствени установи.
Вакцинацијата е незадолжителна по избор на граѓанинот и се наплаќа по 400 денари.
За годинава се набавени околу 30.000 дози тритипна вакцина, производство на реномираната фармацевтска компанија „Глаксо Смит Клајн“ од Белгија, од кои најголем дел се наменети за центрите за јавно здравје, а помал дел за приватни здравствени установи, овластени за вакцинација против грип.
Вакцините се безбедни, со врвен квалитет, согласно препораките на Светската здравствена организација и се испитани и одобрени од Бирото за лекови при Министерството за здравство.
Грипот е сезонско заболување, кое најчесто се пренесува по воздушен пат, со близок директен контакт со заболениот, кое обично дава лесна клиничка слика, но може и да заврши со посериозни комликации. Токму затоа, Министерството за здравство им препорачува на граѓаните, посебно на лицата од ризичните групи, како што се постари лица над 60 години, хронично болните, децата од шест месеци до пет години, бремени жени и здравствени работници, навремено да се вакцинираат со цел навремено создавање имунитет на организмот против вирусот на грип.