Министерството за здравство, ве поканува на традиционално одбележување на Европската недела на имунизација, што ќе се одржи утре (сабота, 22 април) со почеток од 12:00 часот во Зоолошката градина во Скопје.
Европската недела на имунизација, која годинава по 12. пат се одбележува под мотото „ЗАШТИТИ, СПРЕЧИ, ВАКЦИНИРАЈ!“, се организира во соработка со Канцеларијата на Светската здравствена организација во Македонија и Здравствен дом-Скопје.
На настанот со свои ритмички точки и рецитали ќе настапат ученици од повеќе основни училишта од Скопје и деца од хорот Златно славејче. Настанот е со забавен, како и информативен карактер, со цел потсетување на бенефитите од вакцините и фактот дека со помош на вакцините се елиминирани и во голема мера се редуцирани многу тешки заболувања, како што се вариола вера, дифтерија,парализа и други заразни заболувања.
Еден од врвните приоритети на Министерството за здравство е грижата за здравјето на децата, и во таа насока континуирано работиме на осовременување на календарот за имунизација. Посебно значајно е воведувањето на поливалентните вакцини, со кои значително се намали бројот на боцкања во текот на првата година од животот на децата. Со само едно боцкање најмладите се штитат од многу болести, а со редовната вакцинација постигнуваме колективен имунитет и стабилна епидемиолошка состојба. Од почетокот на воведувањето на поливалентните вакцини се искористени над 80.000 дози од петвалентните и шествалентните вакцини.
Исто така, родителите имаат можност бесплатно да ги вакцинираат децата и со вакцина против стрептококни заболувања, која е незадолжителна и е наменета за деца на возраст од шест недели до пет години. Оваа вакцина штити од повеќе заболувања, како што се тешки пневмонии, воспаление на увото, менингит, особено кај малите деца и децата со намален имунитет.